Adrián López manifestou esta mañá na sala de prensa de Abegondo que este domingo 17 de decembro no Camp Nou (20:45 horas, Movistar Partidazo), "se somos capaces de defender ben, imos ter as nosas opcións de poder facerlles dano".
Subliña o atacante deportivista que esas opcións do Dépor de traerse algo positivo "son reais, claro que son reais. Está claro que se pode. Temos que facer todo o posible para tentar logralo. Logo está claro que é difícil".
Confesa que "se teñen que xuntar varias cousas para poder sacar algo positivo. Tes que facer un partido perfecto, eles igual non ter o seu mellor día. Sabes que vas a un sitio que é complicado sacar algo".
Ve ao vestiario "con ilusión, con ganas de ir alí a competir ben o partido e tentar sacar algo. Nós temos ilusión e ganas en competir ben e tentar facer un bo partido alí".
Preguntado pola sociedade Adrián-Çolak-Carles Gil, sostén que "aquí todos os xogadores somos importantes. Çolak é un máis, pero igual que Çolak hai máis compañeiros. Ao final aquí somos todos un equipo, non hai que pensar nun tridente, nunha dupla. Aquí somos un equipo e o que estea no campo ten que dar o cento por cento para o ben do equipo".
A nivel persoal, cre que ten que "seguir mellorando cada día porque aínda podo estar a mellor nivel. E iso é o que queremos todos, dar o noso mellor rendemento para ben do equipo. Oxalá que podamos seguir dándolle alegrías a nosa afección e que sigan pensando ben de nós".
Garda gratos recordos do Camp Nou, posto que alí, fai once anos, estreouse como goleador no Dépor e en Primeira División: "Foi un balón longo que disputei de cabeza con Puyol. Quedou por alí o rexeite e segundo caemos os dous reaccionamos a polo balón. Eu cheguei un pouco antes e puiden chegar até a portería. El viña toda a carreira detrás de min. Unha vez que entrei na área non podía meter moito o pé por se me facía penalti. Estaba a saírme Valdés, piseina un pouco e piqueilla un pouco. Tiven un pouco de fortuna porque lle pasa entre as mans. Igual que lle pasou por aí podía parala. Foi un gol bonito, si", rememora.