Celso Borges, un dos capitáns do Deportivo, manifestou esta mañá na sala de prensa de Abegondo que o equipo acabou a primeira volta da liga nunha posición "mala. É verdade que falamos de non merecernos iso e de estar máis arriba. Pero é a nosa realidade e de aí hai que saír. Como o dixemos sempre, con traballo. Temos toda esta segunda volta para rectificar nós mesmos e poder saír adiante".
O internacional costarriqueño está convencido de que se pode lograr o obxectivo: "Eu estou convencido, os meus compañeiros tamén, e o corpo técnico. A afección polos ánimos que che dá na rúa creo que tamén. Iso hai que transformalo en bos resultados".
Das posibilidades do Dépor no partido deste domingo 21 de xaneiro no Estadio Santiago Bernabéu ante o Real Madrid (16:15 horas, Bein LaLiga), asegura Borges que "é fútbol, e dentro deste concepto créome calquera cousa. Non imos ir alí cunha mentalidade negativa, vendo a ver como se sobrevive. É cuestión de mentalidade e de convencerse que as cousas se poden realizar".
É máis, confesa que un escenario como o coliseo madridista "a todos emociónanos moito e dános moita alegría poder estar nun campo como ese. E imos moi ilusionados con poder facer as cousas ben".
Do conxunto branco, afirma o mediocentro do equipo coruñés que "en calquera circunstancia na que se atope, sempre vai ser un rival moi potente. Dá igual en que situación atópese. O importante para nós é manternos fieis á nosa idea e concentrados porque independentemente de como estean, é un equipo que sempre xera ocasións de gol e sempre hai que estar metidos".
Preguntado polos erros individuais do pasado sábado ante a Valencia, Celso Borges foi tallante: "Non se perde por culpa dun xogador, nin se gaña tampouco. Todo o grupo ten que apoiarse entre si nas boas e nas malas".
