Borja Jiménez confesou na sala de prensa del Cerro do Espino que "estamos moi contentos porque volvemos a gañar a un rival directo. Volvemos a gañar fóra de ABANCA-RIAZOR. Xa son varias semanas consecutivas gañando. As xeiras hai que alargalas o máximo posible. Teremos o noso mal momento, entón todo o que podamos ir collendo cando as cousas van ben, moito mellor".
Cre que o Dépor fixo no Cerro del Espino "un partido moi serio. Na segunda parte saio encantado polo control que tivo o equipo en todo o que pasaba. A primeira parte tivemos situacións moi claras de gol; na segunda tamén, con Quiles. Así que contentos: 3 puntos máis, 29 e a seguir".
Preguntado por Aguirre, que debutaba no once inicial, apunta que "como é normal, no seu primeiro partido co Dépor de titular iniciou algo nervioso, pero logo estivo a un nivel moi alto. Temos aos mellores laterais da categoría, non teño ningunha dúbida. Demóstrano cada día. Pola nosa forma de xogar os laterais teñen un protagonismo moi alto porque están sempre moi preto da área. Encantado cos dous (en referencia tamén a Víctor pola dereita) e cos que non participan: Trilli, Benito, Valín... Hoxe Héctor. Moi contento nesa demarcación, estamos encantados".
O técnico deportivista valora esta nova vitoria porque "gañar é moi difícil. Cada xornada é moi difícil gañar. Entón todo o que podamos sumar vainos a achegar máis ao obxectivo, pero queda moitísimo. A pena é que non se acabe hoxe mentres vaiamos líderes, pero hai que gozar porque son momentos moi bonitos. Cando veñen as xeiras menos bonitas pásase mal e agora que gozar e mañá a adestrar para preparar o seguinte".
Desvelou ademais que o Dépor pasou unha semana "complicada porque tivemos un foco de infección grande no vestiario cos catarros. Tivemos xogadores con febre, moi cansos. Creo que nos reforza moito. É moi positivo".
Borja Jiménez insiste que "temos moi claro, desde o adestrador, todo o que nos vai a custar. Como llo repetimos constantemente o que teñen que facer é traballar máis que onte. E mañá teñen que traballar máis que hoxe. Intúo que na contorna a xente está feliz. Ao meu encántame xogar fóra de ABANCA-RIAZOR e que veñan mil e pico persoas, como despiden ao equipo... E estou convencido de que o día que non gañemos vano a facer igual e eles van ser os que nos saquen da fochanca. Agora é momento de gozar, pero sen ningún tipo de euforia, de seguir traballando. Isto é larguísimo aínda".
Cunha xeira de 7 puntos de 9 posibles fronte a rivais directos nos tres últimos encontros fóra de ABANCA-RIAZOR, o adestrador branquiazul sostén que "o equipo cada vez fai máis cousas. Nós cremos que o equipo cada vez evoluciona máis, manexa máis rexistros. Dentro deses rexistros ten a capacidade cada día de facelo mellor e iso axúdache a ser máis competitivo. Temos moi claro que o obxectivo é ser valentes en cada campo, saír a gañar e así vai ser sempre. Son dos que pensa que o ser gañador axúdache a que o día que teñas que gañar xa o fixeches máis veces".
A pesar do liderado, subliña que hai que mellorar "en todos os aspectos, porque aínda de cada partido sacamos bastantes erros. Os xogadores din que somos moi pesados, pero insistímoslles moito nesa mellora individual que ao final che leva á mellora colectiva. É moi importante todo o que esixen os que non están a xogar aos que xogan máis habitualmente e o equipo irá crecendo. Temos que sacar mellores transicións, decidir mellor en últimos metros... Pero hoxe si que en tres cuartos por exemplo, que o demandamos outros días, tivo moita máis velocidade, foi moito máis vertical. Van metendo cousas na maleta e rexistros diferentes que nos axudan a ser máis completos".
