Juan Antonio Anquela citou a 22 futbolistas para o partido desta tarde (19:00 horas) fronte ao Unionistas de Salamanca CF no Campo de La Veigona, en Luarca (Asturias). Será o penúltimo partido antes do arranque ligueiro, e estará en xogo o XX Trofeo Ramón Losada.
As novidades son a presenza de David Simón por primeira vez nesta pretemporada; e da nova incorporación deportivista, o lateral Luis Ruiz.
O Luarca CF, organizador do encontro, fixou os seguintes prezos para as entradas:
-Tribuna: 15 euros
-Xeneral: 10 euros
-Entrada xuvenil (até 18 anos): 5 euros
-Menores de 12 anos: gratis
Esta mañá na Cidade Deportiva, após un quecemento e uns rondos, os futbolistas que terán máis minutos esta tarde realizaron un ensaio de accións a balón parado. O resto completou a sesión cunha tarefa de posesión e fútbol en espazo reducido.
Só Diego Rolan exercitouse á marxe do grupo, ás ordes do readaptador Fran Molano.
Tralo partido, o Deportivo adestrarase de novo mañá xoves 8 de agosto ás 10:00 horas en Abegondo.
