Fede Cartabia é a novidade na lista de 18 convocados de Natxo González para o partido desta tarde en ABANCA-RIAZOR (20:30 horas, GOL e LaLiga 1|2|3 TV) ante o Real Oviedo, correspondente á 13ª xornada en LaLiga 1|2|3.
Quedan fóra da convocatoria de maneira obrigatoria Borja Valle, por sanción; e Pedro Sánchez e Dubarbier, por lesión.
A pesar de ser día de partido, o técnico deportivista citou esta mañá a todo o seu equipo na Cidade Deportiva ás 09:30 para almorzar.
Unha hora despois, baixo unha persistente choiva, os futbolistas exercitáronse por espazo de 30 minutos no campo 3 da Cidade Deportiva. Houbo un quecemento, uns rondos e un último repaso táctico a cargo de Natxo González.
Os 18 futbolistas convocados concéntranse este mediodía no Hotel Meliá María Pita.
Após o encontro ante o Oviedo, todo o cadro adestrarase de novo mañá domingo ás 11:00 en Abegondo.
