Luis César confirmou na sala de prensa de Abegondo que Álex Bergantiños e Peru Nolaskoain serán a parella de mediocentros mañá sábado 2 de novembro no Estadio Fernando Torres de Fuenlabrada (16:00 horas, Movistar LaLiga 1), aínda que tamén advertiu que ao longo da temporada, os outros dous centrocampistas, Gaku e Vicente, "xogarán tamén, seguro".
O técnico deportivista concluíu a súa intervención ante os medios de comunicación, minutos antes de subirse ao autocar do equipo rumbo a Fuenlabrada, cunha mensaxe de optimismo: "Sacaremos isto para adiante seguro. E ben".
Ve ao conxunto madrileño como "un equipo revelación. Se analizamos os obxectivos de todos os equipos de Segunda División, o mellor, o que está por encima de todos os obxectivos, de todas as expectativas, é o Fuenlabrada. É un equipo que sabe o que fai. Leva máis do 70 % dos goles marcados a balón parado. Espectacular. Un equipo que expón partidos rudos e complicados no seu campo a todo o mundo e que está de sorte. Unha boa pedra de toque para nós. Gañar alí sería unha lombeirada a través de coartar, limitar, o fútbol que eles tentarán facer e que nós sexamos capaces en todo momento de xogar o partido inesperado para eles".
Preguntado precisamente sobre se non é o forte do Dépor un partido de pelexa, de contacto, Luis César afirma: "Terá que ser. Cada semana hai un rival que ten un tipo de xogo e tes que saber contrarrestalo. Hai que sobrepoñerse a eses rivais, a eses tipos de fútbol que che expoñen cada domingo os equipos e o Fuenlabrada ten o seu fútbol que lle está dando grandes resultados".
Asegura o adestrador branquiazul que "cada partido chegamos con máis fortalezas que o anterior. En Santander chegamos dunha maneira e a Fuenlabrada chegamos con máis fortalezas e virtudes que a semana pasada".
Conta que os días previos transcorreron de maneira positiva: "Os bos resultados pon á xente de bo humor e dálles confianza. O bo humor é causa-efecto. É máis fácil gañar de bo humor e gañar ponche de bo humor. Estamos mellor, si. Habemos visto que o outro día a segunda parte xogámola en campo contrario, sometemos ao equipo rival. E é unha semana máis, para modelar os pensamentos da xente, as ideas que eu quero que se cumpran no campo, para ir perfeccionando o noso xogo, ir sendo un equipo mellor, mellor nos nosos cimentos. Estamos nunha loita contrarreloxo. Cada semana que pasa sen gañar complicámonos un poquitín máis a vida".
En canto a Beto da Silva, descartado novamente hoxe, Luis César comenta que "me doe deixalo a el. Pero pode haber un momento que deixe a 3 fóra e que el sexa un dos que estea dentro. Pero para metelo a el teño que sacar a 1 dianteiro e a día de hoxe penso que non debo de facelo".
A Aketxe, considérao o técnico do Dépor "en 2 posicións. Pero penso que onde podemos sacar máis rendemento del é detrás da punta. Sei que pode xogar a perna cambiada na dereita. Xogou no Cádiz. E fíxoo ben, mesmo meteu goles".
Finalmente, de Koné, cre que está "máis preto do seu bo potencial, máis preto do seu tope que moitos outros. Trataremos de que el chegue ao seu tope de potencial e que os outros o melloren porque teñen moita marxe de mellora".
