Mañá de recuperación e baixa intensidade baixo a néboa de Abegondo
O cadro do Deportivo, hoxe co fabrilista Adri Castro, completou esta mañá un adestramento de baixa intensidade, como adoita ser habitual dous días antes de cada partido.
Baixo a néboa de Abegondo, os futbolistas branquiazuis realizaron un quecemento, un exercicio táctico e un roldo no centro do campo 2 para concluír. A continuación tocou ximnasio e paso pola padiola dos fisioterapeutas.
Unicamente Derik e Miku, os dous tocados a día de hoxe, realizaron un adestramento específico baixo a tutela dos Servizos Médicos.
Mañá sábado, o Deportivo adestrarase ás 10:30 na Cidade Deportiva. Ao concluír, Fernando Vázquez fará pública a lista de convocados para recibir este domingo 29 de novembro en ABANCA-RIAZOR ao Racing de Ferrol (19:00 horas, TVG).