Natxo González, técnico do Deportivo, non cre que o equipo teña a presión de non poder fallar en ABANCA-RIAZOR dado que fóra da Coruña os resultados non son tan óptimos: "Se agora sentimos iso, malo. O único que nos ten que facer é darnos seguridade. Perderemos puntos en casa, seguro. Imos tratar de que sexa o máis tarde posible. Agora mesmo non pode supor unha presión volver como local. Todo o contrario".
Recoñece o adestrador deportivista que "a presión por non fallar sempre pode existir. Pero podemos fallar. ¿Por qué non? Ao final non somos invencibles. Claro que podemos fallar. Claro que nunca pensamos niso. Logo se fallamos, xa veremos que resposta damos. A estas alturas non creo que teñamos motivos para sentir esa presión máis aló da que temos desde o inicio, que é estar entre os mellores".
Con Álex Bergantiños fóra da convocatoria para mañá sábado 24 de novembro en ABANCA-RIAZOR ante o Atlético Osasuna (18:00 horas, Movistar Partidazo), Natxo González ve a Pedro Mosquera, un dos candidatos a esa praza no once, "ben. Ilusióname poder velo mañá. Ao final o día a día, díxoo hai pouco o seu compañeiro Álex Bergantiños, adestra moi ben, ao 100%. Como se adestra ao 100%, está preparado para mañá facer un bo partido".
Afirma que a resposta do Deportivo mañá será "con máis presenza de balón se eles teñen un repregamento baixo e se eles presiónannos moi arriba teremos que correr máis. Temos que estar preparados e creo que estamos preparados para calquera das dúas circunstancias. Iso vai en función do que o rival nos propoña".
Do Atlético Osasuna conta que "empezou moi irregular. A mala fortuna é que lles pillamos na mellor dinámica da temporada, con 10 puntos dos últimos 12; e atopando un pouco esa regularidade e continuidade. Iso a nivel colectivo e por suposto con xogadores desequilibrantes en canto a calidade, en canto a velocidade. É un reto bonito mañá".
Tamén confesa que "hai un pouquiño de desquite" con Arrasate, técnico do Atlético Osasuna, que a pasada temporada eliminou co Numancia ao Zaragoza de Natxo en semifinais do play off de ascenso: "Son duelos que non se esquecen. Tamén son duelos que segundo se desenvolveu o máis normal é que nós gañásemos. É bo amigo, Hai un pouquiño de rancor pero como é bo amigo, tampouco imos excedernos demasiado", chancea.
