Natxo González non se fía da situación clasificatoria do Nàstic de Tarragona, rival do Dépor mañá sábado 16 de febreiro en ABANCA-RIAZOR (16:00 horas, LaLiga 1|2|3 TV).
Así o deixou claro na rolda de prensa previa ao partido: "Somos maiorciños para saber, e a experiencia que temos, que é un equipo máis da categoría. Máximo respecto como se ten a todos e saber que imos ter moita dificultade. Nós xogámonos moito, pero eles xóganse moitísimo tamén".
Advirte o adestrador deportivista que o conxunto catalán "nos dous últimos anos fixo verdadeiros milagres para manter a categoría. Sabemos que se non estamos ao noso mellor nivel, non gañaremos o partido".
Nesta liña, insiste en que "non distingo mellores, peores... todos son moi respectables pola categoría na que están. Se non facemos as cousas ben non imos gañar o partido. Somos conscientes diso. Temos que saír ao campo moi, moi concentrados e que non nos pase o que nos pasou o día do CD Tenerife".
Do conxunto que prepara Enrique Martín, comenta que "é moi novo. É difícil de sacar excesivas conclusións. Aínda encima a semana pasada non competiu. Podes guiarte polo partido do Rayo Majadahonda e da UD Las Palmas principalmente".
Vaticina un partido "de moitos duelos individuais, de moita intensidade, de moita agresividade, incómodo. E para iso temos que mostrar nosa mellor versión para poder xerar situacións de gol. Non o considero un equipo defensivo, a pesar de que poida que xoguen con 3 centrais. Acumulan moita xente en zona de remate e son xente poderosa. Teñen bastante presencia en centros laterais e accións a balón parado".
En canto ás baixas do Dépor para o partido, ben por lesión ou por sanción, o técnico branquiazul manifestou que "todos nos necesitamos, ímonos a necesitar para poder cumprir os obxectivos. Temos que dar resposta a sancións, a lesións. E diso dependerá que se poida estar máis arriba ou máis abaixo".
Confirmou que mañá Somma será un dos centrais: "Alégrome de que teña mañá esa oportunidade porque é impresionante a profesionalidade deste rapaz no día a día, a pesar de non estar a contar con minutos. E eu alégrome moito de que esta oportunidade lle chegue".
Aos afeccionados deportivistas, Natxo González lémbralles que "quedan 9 partidos en ABANCA-RIAZOR, por 3: 27 puntos. Se conseguísemos todos os puntos, andariamos aí aí xa. Son fundamentais e pedirlles que nos boten unha man cando haxa adversidade, cando as cousas non están ben. Aí é cando necesitamos o maior apoio. Moitos deles sempre están aí dándonos o seu apoio pero isto canto máis xeneralizado sexa mellor, porque o imos a necesitar. Cada vez estámonos xogando todos máis cos puntos, para arriba, para abaixo. Son decisivos tamén eles para botarnos unha man".
Preguntado polos dous fabrilistas na convocatoria, Montiel e Arturo Segado, recoñece que "é difícil que dous rapaces que suban do filial poidan cambiar, nunha zona tan importante como na de creación, o signo dun partido".