O Deportivo ABANCA reencóntrase mañá domingo 1 de decembro (11:45 horas, Gol) coa afección branquiazul en Abegondo despois de 35 días do último partido, ante o CD Tacón o pasado 27 de outubro. O rival nesta ocasión será o Sevilla FC, outro dos clásicos da Primera Iberdrola.
Atrás queda máis dun mes atípico con parón de seleccións, unha folga e a visita aos dous grandes do fútbol español, Atlético de Madrid e Barcelona, saldada en ambos os casos con lóxicas derrotas deportivistas, dado o potencial de madrileñas e catalás.
Manu Sánchez confirmou en rolda de prensa a recuperación de Laura e María Méndez para o encontro. "Temos aí a Patri Díaz con molestias nun xeonllo. Athenea está de baixa por enfermidade", desvela. Tampouco estará entre as elixidas Maya Yamamoto, "un pouquiño pachucha", segundo explica o técnico deportivista debido "aos cambios de tempo".
A convocatoria intégrana 18 futbolistas, entre as que se atopa a canteirá María Calvo.
Como é habitual, os socios do Deportivo poden acceder libremente ao partido ensinando o seu carné da temporada, até completar capacidade. Para o público, as entradas custan 10 euros, dispoñibles mañá domingo, día do partido, desde as 10:45 horas nos despachos de billetes da propia Cidade Deportiva.
Tralo partido ante as andaluzas, o Deportivo ABANCA terá o luns 2 de decembro xornada de descanso e volverá aos adestramentos o martes 3 ás 17:00 horas en Abegondo.
