Tralo día de descanso de onte xoves, o Deportivo, cos fabrilistas Gaizka e o meta Pedro López, retomou os adestramentos esta chuviosa mañá en Abegondo, cos cinco sentidos postos no partido ante o Granada do luns 24 de setembro (21:00 horas, Gol e LaLiga 1|2|3 TV), correspondente á 6ª xornada de LaLiga 1|2|3.
Os técnicos branquiazuis fixeron especial relevancia en aspectos ofensivos. Así, os atacantes, salvo o lesionado Borja Valle, realizaron un exercicio con finalizacións baixo a supervisión de Bernardo Tapia. Mentres tanto, o resto dos futbolistas, na outra metade de campo, tiveron un exercicio de posesión.
Un partido táctico 11 contra 11 e ensaio de accións a balón parado, hoxe principalmente saques de esquina, puxeron o punto e final ao adestramento sobre o céspede, de 2 horas de duración.
Adestráronse á marxe do grupo, no ximnasio e cos fisioterapeutas, Borja Valle, Diego Caballo e Dubarbier.
Mañá sábado, o equipo regresará a Abegondo, a partir das 11:00 horas.
