O Deportivo regresou esta mañá aos adestramentos en Abegondo, xa centrado na visita do Real Zaragoza a ABANCA-RIAZOR prevista para este domingo 8 de decembro (16:00 horas, #Vamos).
A novidade positiva foi a presenza no grupo de Jovanović e Salva Ruiz. O serbio completou toda a sesión por segunda vez trala do pasado luns, mentres que o lateral zurdo deportivista, tal e como estaba previsto polos Servizos Médicos, retirouse aos vestiarios unicamente na parte final.
Si tiveron adestramento específico David Simón e Beto da Silva; ademais do dianteiro venezolano Christian Santos. Pola súa banda, Luis César contou hoxe coa participación dos fabrilistas Mujaid, Gandoy, Boian e Iago Parga.
O técnico deportivista fixo especial fincapé no traballo táctico ofensivo, nas chegadas á área rival. Após finalizar o encontro ante o CD Lugo no Anxo Carro, lamentouse Luis César na sala de prensa que "as aproximacións vantaxosas non se converten en ocasións de gol. Perdemos opcións de facerlle dano ao Lugo".
Un partido a tres cuartas partes do campo 3 e unha serie de partidos en espazo reducido, de alta intensidade, puxo o punto e final a unha longa sesión que se prolongou por espazo de case 2 horas no céspede.
Mañá xoves, o equipo adestrarase en Abegondo a partir das 11:00 horas. Os futbolistas están citados ás 9:30 para almorzar nas instalacións habilitadas para tal fin.
