O Xuvenil A entrará mañá martes 14 de decembro no sorteo da eliminatoria de playoff da UEFA Youth League que terá lugar ás 12:00 en Nyon (Suíza), retransmitido en directo pola UEFA por streaming.
O vixente campión de España, que eliminou ao MKS Pogoń Szczecin polaco e ao Maccabi Haifa FC israelí nas dúas eliminatorias da Ruta de Campións Nacionais, quedará emparellado, a partido único que se celebrará o 8 ou 9 de de febreiro de 2022 en ABANCA-RIAZOR, cun destes equipos, segundos clasificados de grupo da Ruta Champions League: BV Borussia 09 Dortmund (Alemaña), FC Internazionale Milano (Italia), Club Brugge KV (Bélxica), Chelsea FC (Inglaterra) ou FK Dynamo Kyiv (Ucraína). Tamén pasaron como segundos de grupo Atlético de Madrid, Villarreal CF e Sevilla FC, que non lle poden tocar ao Dépor ao ser do mesmo país.
Xunto ao vixente campión de España clasificáronse na Ruta de Campións Nacionais estoutros equipos: AZ Alkmaar (Holanda), Empoli FC (Italia), KRC Genk (Bélxica), HNK Hajduk Split (Croacia), FC Midtjylland (Dinamarca), Rangers FC (Escocia) e MŠK Žilina (Eslovaquia).
