Os futbolistas xuvenís Jairo Noriega Figueroa (A Coruña, 14 de agosto de 2003) e Yeremay Hernández Cubas (Las Palmas de Gran Canaria, 10 de decembro de 2002) foron a novidade no adestramento matinal do Deportivo en Abegondo, segundo desta semana na que se pecha a temporada.
Os dous adestráronse ás ordes de Rubén de la Barrera, ademais dos xa habituais Adri Castro, Alberto e Iván Guerrero.
O centrocampista Jairo debutou co Fabril ante o CD Estradense o pasado domingo. Cumpre a súa décima temporada no Club e o seu primeiro equipo foi o Benxamín B. O canario Yeremay, que forma parte do Dépor desde o Cadete A de División de Honra, é habitual desde hai varios meses nas convocatorias de Juan Carlos Valerón co filial.
Na sesión de hoxe, o técnico coruñés dispuxo un quecemento con xogos e rondos; un partido a tres cuartas partes do campo 2; e fútbol en espazo reducido, de alta intensidade.
Tiveron adestramento específico Derik, Keko, Mujaid, Miku, Gandoy e Lucho, este a consecuencia dunha contusión.
Mañá venres 7 de maio, o equipo cambia o plan previsto inicialmente e traballará en ABANCA-RIAZOR, a porta pechada, a partir das 10:30.
