RCD / NOVAS

Pantilimon: "É normal que a xente espere máis de nós"

27/09/2017 22:53

O internacional romanés Costel Pantilimon foi o protagonista esta mañá na sala de prensa de Abegondo, unha vez finalizado o adestramento do Deportivo.

Incorporado o último día do mercado de fichaxes, cedido polo Watford inglés, asegura que "me foi fácil e rápido adaptarme ao Deportivo".

Co equipo na zona baixa da clasificación, apunta o meta deportivista que "é normal que a xente espere máis de nós. Temos un cadro bo, un adestrador bo. Espero que empecemos a gañar xa pronto para quitarnos a presión de encima".

Preguntado sobre a situación de Pepe Mel, Pantilimon cre que "está a facer un bo traballo. Obviamente os resultados non son bos, non están do noso lado. Pero el está a traballar para que isto mellore. O mellor agora é que haxa continuidade e que non haxa debate. Estamos a traballar duramente para mellorar os resultados. Todo o mundo é responsable dos resultados. É o equipo o que gaña e é o equipo o que perde".

É consciente de que o equipo o fixo mal "tomando decisións en defensa. Pero a culpa témola todos. Estamos a traballar nos adestramentos para mellorar, para corrixir erros. Se seguimos traballando, no futuro xogaremos moito mellor".

Para o encontro deste sábado no Estadio ABANCA-RIAZOR ante o Getafe (13:00 horas, Bein LaLiga), en opinión de Pantilimon, "temos a mesma responsabilidade. É importante gañar o seguinte partido porque é importante para nós. E obviamente para que os afeccionados estean orgullosos de nós".

A nivel particular, vese "mellorando partido a partido. Non estou contento cos resultados. Temos que mellorar. Eu podería mellorar. Síntome ben, estou a traballar duro para ir mellorando".

Máis novas de: PANTILIMON