O Deportivo realizou esta mañá a primeira sesión de traballo desta semana, a do inicio de liga este domingo 20 de agosto no Estadio ABANCA-RIAZOR ante o Real Madrid (22:15, Movistar Partidazo). Foi a primeira sesión co grupo de Adrián López, despois de incorporarse ao Club o pasado venres.
Todo o equipo, incluídos os fabrilistas Edu Expósito e Francis, realizou en primeiro lugar un traballo preventivo nun dos ximnasios da Cidade Deportiva e, xa sobre o céspede do campo 3, un exercicio de fútbol a tres cuartas partes de campo.
A continuación, os futbolistas que xogaron máis minutos o pasado sábado en La Orotava, no Trofeo Teide ante o CD Tenerife, retiráronse aos vestiarios para realizar tarefas de recuperación: Juanfran, Luisinho, Schär, Bakkali, Borges, Arribas, Bruno Gama, Fede Cartabia e Guilherme. Os demais completaron a sesión con fútbol en espazo reducido e un traballo táctico-físico.
Andone, con permiso, non se pasou hoxe por Abegondo e Fede Valverde, que se recupera dun proceso febril, quedou no ximnasio. Albentosa acabou con molestias nun nocello, pendente de revisión médica.
Mañá martes 15 de agosto haberá xornada de descanso. O equipo retorna aos adestramentos o mércores 16 ás 10:30 na Cidade Deportiva de Abegondo.
