RCD / NOVAS

Sheila, gardameta procedente do CPM Friol, oitava incorporación do DEPORTIVO ABANCA

03/07/2017 10:59

Sheila Fernández Suárez (Santiago de Compostela, 21 de marzo de 1997), coñecida deportivamente como Sheila, é a oitava cara nova do DEPORTIVO ABANCA para afrontar o curso 2017-2018, a segunda temporada da historia do conxunto feminino branquiazul.

Sheila chega ao DEPORTIVO ABANCA para completar a terna de gardametas, xunto a Anita e Malena. A porteira santiaguesa militou a pasada campaña no CPM Friol, que competiu coas branquiazuis no grupo 1º de Segunda División Nacional, obtendo un meritorio quinto posto. Só Oviedo Moderno, DEPORTIVO ABANCA, Sporting de Gijón e Atlántida Matamá superaron ao conxunto friolés.

Con anterioridade, Sheila xogou en SD Cacheiras (2006-2012), SD Compostela (2012-2013) e FVPR El Olivo (2013-2016). Seleccionada galega nas categorías Sub-16 e Sub-18, tamén foi convocada para diversas concentracións coas seleccións españolas Sub-16 e Sub-17 durante o ano 2013.

Coa incorporación de Sheila, Manu Sánchez, adestrador branquiazul, conta con 22 futbolistas ás súas ordes: Anita, Estefi, Miriam, María Corral, Nuria, Raquel, Tere Abelleira, Kika Moreno, Gaby García, Cris, Lía, Malena, Miga, Gere, Silvia Mérida, Peke, Patri Rúa, Iris, Laura Vázquez, Jone Bilbao, Sara e Sheila.