Teresa Abelleira, capitá do Deportivo ABANCA, participou estes días en Albania coa Selección Española Sub-19 nun torneo clasificatorio, con vistas ao Campionato de Europa da categoría.
Hoxe martes 31, o equipo hispano finalizou a súa participación coa terceira xornada, na que derrotou (0-4) a Ucraína. España clasificouse así con pleno de vitorias para a Rolda Elite, paso previo á Fase Final de Suíza.
Fronte ás ucraínas, a xogadora branquiazul saltou ao terreo de xogo de inicio e foi substituída no minuto 79 de partido por Anna Torrodá.
Na primeira xornada, ante a anfitrioa Albania, Teresa Abelleira foi titular na contundente vitoria (0-8) e anotou dous goles, o 0-2 e o 0-4, ambos na primeira metade.
O rival o pasado sábado na segunda xornada de competición foi Azerbaiján. De novo houbo goleada española (6-0), aínda que esta vez a xogadora branquiazul non chegou a saltar ao terreo de xogo.
Teresa Abelleira incorporarase estes próximos días á disciplina do Deportivo ABANCA, que visita ao CD Monte, en partido da 8ª xornada no grupo 1º da Segunda División Nacional, previsto para o domingo 5 de novembro ás 12:30 no campo municipal San Juan en Monte (Santander).
