O temporal de frío que azouta estes días a Galicia obrigou aos técnicos branquiazuis a atrasar ás 12:00 o inicio do adestramento de mañá venres na Cidade Deportiva.
A previsión meteorolóxica fala para as próximas horas en Abegondo dunha temperatura máxima de 9 graos e unha mínima de 1 grao baixo cero; aínda que polo menos sen choiva.
Hoxe xoves, os poucos futbolistas que traballaron no campo atopáronse cun céspede duro pola intensa xeada e cunha temperatura próxima ao cero graos, co que aumenta o risco de lesións para os futbolistas.
Así pois, con esta medida, Fernando Vázquez buscará para o seu cadro a suavidade da temperatura propia das horas centrais do día, espérase que uns 5 graos sobre cero, co que o estado dos terreos de xogo será tamén máis idóneo.
O técnico deportivista ten previsto comparecer ante os medios ás 11:15 horas, na rolda de prensa previa ao partido deste domingo 10 de xaneiro no Estadio Ruta de La Plata ante o Zamora CF (17:30 horas).
