Adri Castro reincorporouse esta mañá aos adestramentos do Deportivo. O dianteiro fabrilista estivo illado dez días após ser contacto estreito cunha persoa que deu positivo en COVID-19. Aínda que a súa primeira PCR foi negativa, Adri Castro viuse obrigado a gardar a pertinente corentena, tal e como estipulan as autoridades sanitarias.
Unha vez pasados os dez días, Adri Castro foi sometido de novo a outra nova PCR, sendo tamén negativa, co que recibiu o visto e prace dos Servizos Médicos branquiazuis para volver ao céspede.
Ademais de Adri Castro, hoxe os fabrilistas Juan Rodríguez e Pablo Brea adestráronse ás ordes de Fernando Vázquez, nunha mañá de recuperación para os titulares onte en Guijuelo. Este grupo de xogadores quedaron no ximnasio e pasaron pola padiola dos fisioterapeutas.
Para o resto do cadro, incluídos Claudio Beauvue e Álex Bergantiños, houbo unha sesión de alta intensidade, con rondos, un circuíto físico con finalizacións e fútbol en espazo reducido, para concluír.
Mañá martes haberá xornada de descanso. O equipo regresa aos adestramentos o mércores 25 ás 10:30 en Abegondo.
