Calfensa, novo provedor de servizos de mantemento do campo de ABANCA-RIAZOR, iniciou os traballos de rexeneración no Estadio e nos campos de adestramento do primeiro equipo masculino na Cidade Deportiva de Abegondo.
Aproveitando que esta temporada concluíu unhas semanas antes do habitual e que o período entre campañas é máis amplo, os traballos que se están realizando no Estadio son dun maior calado que en anteriores parénteses. Coa utilización da máquina Koro retiráronse os dous centímetros de superficie de cuberta vexetal para rexenerar as capas superiores de drenaxe de area e terra antes de resembrar por completo o céspede de ABANCA-RIAZOR de cara á temporada 2021-2022.
Os traballos esténdense por un período aproximado de cinco días antes de que se inicien a sementa e coidado do crecemento da planta con todos os tratamentos necesarios.
A compañía galega Calfensa, que nos últimos anos xa realizara varios traballos en Abegondo, é desde este mes a encargada de todas estas actuacións no Estadio e na Cidade Deportiva, así como do mantemento futuro da instalación principal do Real Club Deportivo grazas ao acordo ao que chegou para ofrecer servizo de primeiro nivel axustado ás actuais necesidades do Club.
