Os futbolistas do Deportivo Emre Çolak e Rubén Martínez serán os encargados mañá venres de entregar os diplomas aos 150 nenos e nenas que participaron na cuarta quenda do DéporCampus Cabreiroá 2017 en Abegondo.
O acto, como é habitual, será ás 12:00 horas no campo de herba sintética da Cidade Deportiva de Abegondo.
A próxima semana, do 24 ao 28 de xullo, a actividade dos DéporCampus Cabreiróa 2017 reunirá a 199 nenos distribuídos na quinta e última quenda de Abegondo (96), Ordes (56) e Monforte (47).
Este ano, a sede central na Cidade Deportiva de Abegondo pasou de 3 a 5 semanas de actividade (a última de xuño e todo xullo). Os DéporCampus Cabreiroá estrearon ademais 4 sedes: As Pontes, Santiago, Ordes e Zas, que se suman ás xa existentes en Abegondo, Viveiro, Rianxo, Bertamiráns, Ferrol, Monforte e Xenebra (Suíza).
O RC Deportivo organiza esta actividade dirixida polos técnicos do Club co obxectivo de transmitir habilidades e conceptos futbolísticos, ademais dos valores que representa o Dépor: respecto, solidariedade, amizade, xogo limpo, integración, esforzo e felicidade.
Máis aló das actividades, o equipamento deportivo (composto de camiseta, pantalón e medias), a froita e o zume diarios, o diploma final, a visita dun dos xogadores do primeiro cadro deportivista (sempre dentro das posibilidades do calendario do equipo) e un sorteo final de agasallos, son outros dos atractivos dos DéporCampus Cabreiroá, que teñen un horario de mañá de 10:00 a 14:00 horas.
Charla sobre fotoprotección
Os nenos que participan na cuarta quenda do DéporCampus Cabreiroá 2017 de Abegondo recibiron hoxe xoves 20 de xullo diversos consellos sobre fotoprotección, a cargo de profesionais do Colegio Oficial de Farmacéuticos de A Coruña.
Esta campaña, que leva por título 'Farma Protección para Soletes', pretende concienciar aos máis pequenos da necesidade de protexerse do sol, captando a atención cunha mascota animada. Así, un farmacéutico explicou a nenos e nenas do DéporCampus Cabreiroá os efectos negativos do sol.
