Manu Sánchez lamentouse hoxe na sala de prensa de Abegondo de que no partido de mañá domingo 31 de xaneiro (18:30) en Abegondo do Deportivo ABANCA ante o Levante UD non poida contar co alento de #ANOSAFORZA: "Para nós era fundamental. Xa desde o ano do ascenso creouse unha comuñón entre o equipo e a afección, cun ambiente especial e diferente aquí en Abegondo. Estamos a notar a ausencia da xente. Non é ningunha escusa dos resultados do equipo pero si que é algo que tanto as xogadoras, como nós mesmos ou os rivais destacan. Esa forza que tiñamos desde a bancada desapareceu e nótase moito. É unha mágoa que non podamos estar nós con #ANOSAFORZA xuntos neste camiño. É un obstáculo máis que temos que saltar".
O técnico deportivista, que leva catro partidos sen gañar, cre que "o equipo está ben. A xeira (positiva) cortouse co partido do FC Barcelona, que eu creo que sacamos cousas moi positivas. Despois en Tenerife fixemos un desastre de partido e trouxemos unha derrota máis que merecida. Pero a semana pasada en Valencia creo que non é un partido para vir cun 3-0. Máxime vendo que tivemos ocasións suficientes para poñernos diante no inicio do partido. Creo que o equipo estivo moi ben, entrou moi ben, fixo unha gran primeira parte. Logo ao final eses pequenos detalles que marcan o final de cada partido penalizáronnos".
Asegura que "elas son conscientes do que fixemos alí. O equipo non está tan mal como parece pero si que é certo que nesta liga tan competida hai equipos que fan moi ben as cousas e non conseguen sacar os partidos adiante. Estar aí abaixo custa para reverter a situación. Pero eu estou moi contento con esta semana de traballo, vinas moi ben. Temos que tentalo mañá, con todas as da lei e tentar facer valer Abegondo".
A catro puntos da salvación aínda que con tres partidos menos, Manu Sánchez confesa que "eu tento apartarme de todos os cálculos. O que temos diante mañá é o Levante UD. Procuro non facer contas da leiteira. Contamos con disputar todos os partidos desta competición e é o que temos que facer. Hai un determinado número de puntos que temos que lograr para a salvación. É o que imos tentar".
É consciente o adestrador coruñés que "as xogadoras nas súas cabezas están coas súas calculadoras. Nese sentido son todas de ciencias puras. Eu intento apartarme e mentalizalas de que o importante é o que temos por diante. E agora é o Levante UD. Xa pensaremos no que teremos máis adiante. Imos pelexar todos os puntos que temos en xogo e non discriminar en función de rivais, situacións e xornadas aprazadas".
Do rival, lembra que vén de derrotar ao poderoso Atlético de Madrid con claridade (3-0): "Foron moi superioras e plasmouse todo o traballo de María (Pry, adestradora): as ideas que hai, toda a versatilidade que lle dá este cadro que ten".
Finalmente, Manu Sánchez desexou nos últimos días de mercado, "ter a sorte de recibir algunha axuda para afrontar o que resta de campionato. Non temos problema de calidade, pero si de cantidade. A ver se podemos con isto compensar todo".
