Esther Sullastres atendeu aos medios de comunicación esta mañá na sala de prensa de ABANCA-RIAZOR, a pouco máis de 48 horas de visitar ao Sporting Huelva o domingo 23 de maio nos campos onubenses de La Orden (12:00 horas), en partido correspondente á 31ª xornada na Primera Iberdrola.
A gardameta deportivista marchouse con bo sabor de boca o pasado mércores da Ciudad Deportiva Wanda Alcalá de Henares, no partido ante o Atlético de Madrid que concluíu en empate ante un dos poderosos da competición (1-1): "Rascar un punto é un fito importante. Temos que seguir nesta dinámica. No deportivo non sáciache porque é un punto que sabe a pouco. Hai que seguir porque estamos moi contentas co resultado".
Con outro partido decisivo en catro días, incluídos dous longos desprazamentos desde A Coruña, recoñece que "hai unha carga bastante alta para moitas xogadoras. O míster conta case co mesmo once sempre. É certo que hai unha elevada carga de partidos pero hai un compoñente emocional que supera ao físico: todas desexamos estar en Primeira co Dépor ABANCA, salvarnos. E iso tira máis".
Nesta liña, subliña que o traballo "se xestiona ben nestes días. Hai carga nula. Estamos afeitas a xogar entre semana. Sabemos o que hai que facer agora, tampouco fai falta preparar máis o partido. Confiamos no sistema e imos a matar".
Laméntase dos goles a balón parado que recibe o equipo, como o do outro día do Atlético de Madrid, que nesta temporada "son moitos. É unha das razóns polas que estamos aí abaixo. Hai que ser máis contundentes. Estamos a incidir niso aínda que non se note. Estamos a adestrar como defender tanto saques de esquina como faltas laterais".
De cara ao encontro desta fin de semana, Sullastres afirma que "agora mesmo non miramos o escudo do rival que hai diante. Queremos gañar, sexa contra o Atlético... dános igual. Cremos no que facemos, no noso xogo, no noso sistema".
Considera "factible" lograr a salvación, co Rayo Vallecano, equipo que agora mesmo marca a permanencia, a catro puntos: "Ten partidos difíciles. Esta fin de semana contra o Betis. Poden darse resultados... Agora si, nós temos que gañar". "Se gaña o Betis, que sería bo para nós, e nós non gañamos... O primeiro é gañar", insiste.
Titular indiscutible nesta segunda volta da competición, Esther Sullastres confesa finalmente estar "contenta a nivel persoal. A tranquilidade que che achega a continuidade nun posto como a portería é moito máis importante que calquera tipo de preparación. Sentir esa confianza faime tomar mellores decisións, non estar pendente de fallos... Nese sentido estou moi contenta".
