A xogadora do Dépor ABANCA Eva Dios está concentrada na selección española sub-20 para disputar dous partidos amigables fronte a Costa Rica coincidindo cun parón da liga previsto en Reto Iberdrola.
O primeiro dos devanditos encontros entre ambos os combinados nacionais xogouse esta pasada madrugada no Estadio Nacional de San José, capital de Costa Rica.
O triunfo caeu claramente ao lado español (0-5). Eva Dios saltou ao campo no minuto 76 en substitución de Ornella Vignola.
O amigable enmárcase nos actos de celebración do Bicentenario da Independencia de Costa Rica e asistiu unha ampla representación do Goberno do país centroamericano encabezada polo Presidente da República, Carlos Alvarado; e a Ministra de Deporte, Karla Alemán. A delegación española estivo formada entre outras personalidades polo Secretario de Estado para o Deporte, José Manuel Franco; así como polo Asesor á Presidencia da RFEF, o ex deportivista Albert Luque.
A segunda cita amigable entre Costa Rica e España nesta categoría sub-20 terá lugar o domingo 19 de setembro ás 12:00 (hora local, 20:00 horas de España) no mesmo escenario, o Estadio Nacional de San José.
Eva Dios, que este verán ampliou a súa vinculación co Dépor ABANCA até 2023, recolle o testemuño de Paula Novo, do Dépor ABANCA B, que acaba de disputar un torneo amigable en Francia coa selección española sub-19.
