O Deportivo puxo onte en Ordes o punto e final á pretemporada. Foron en total 36 sesións de adestramento entre Abegondo e ABANCA-RIAZOR; e 7 partidos de preparación.
Por diante queda xa a liga, que arranca este domingo 29 de agosto ás 21:30 coa visita do RC Celta B a ABANCA-RIAZOR.
Borja Jiménez deixou claro en rolda de prensa o pasado xoves que, á marxe dos resultados, "o equipo está a comportarse ben. Guíome máis polas sensacións que vai mostrando o equipo de crecemento. Non está o equipo feito, van chegando xogadores pouquiño a pouco. Estamos a crear algo sobre todo con todos os xogadores que temos aí por dentro que empecen a entender o fútbol como a nós gústanos. Esas relacións que se van xerando no campo son positivas. Para min o importante en pretemporada é que as sensacións sexan boas a nivel grupal, que as nosas sensacións sexan boas".
O Dépor chega á competición con tres vitorias, dous empates e dúas derrotas nos sete partidos estivais. Os branquiazuis anotaron doce goles e recibiron oito.
Entre os goleadores, os pichichi estivais foron Alberto Quiles e Miku con tres dianas cada un. O dianteiro andaluz levou ademais o Premio Estrella Galicia ao Mellor Xogador do Trofeo Teresa Herrera.
Os demais goles repartíronos De Vicente, Héctor, Gandoy, Noel, Menudo e William.
Ademais, este verán supuxo a irrupción de #ANOSACANTEIRA, coa base no Xuvenil A campión de España. Así, un total de sete futbolistas debutaron co primeiro equipo nestas semanas de pretemporada: Dani Barcia, Trilli, Mella, Yeremay, Noel, Brais Val e Davo. E outros canteiráns tiveron protagonismo en partidos e adestramentos: Alberto, Juan Rodríguez, Nájera ou Iván Guerrero.
Os resultados de pretemporada do Deportivo foron os seguintes:
RC Villalbés 1 - RC Deportivo 2 (De Vicente e Miku)
Viveiro CF 0 - RC Deportivo 4 (Alberto Quiles -2-, Héctor e Gandoy)
Bergantiños FC 2 - RC Deportivo 1 (Alberto Quiles)
RC Deportivo 1 (Miku) - 2 SD Ponferradina
RC Deportivo 0 - Real Madrid Castilla 0
CD Arenteiro 1 - RC Deportivo 1 (Noel)
RC Deportivo 3 (William, Menudo e Miku) - Pontevedra CF 2
