A Selección Española Sub-17, con Tere Abelleira como titular, deu un gran paso para clasificarse para as semifinais do Campionato de Europa da categoría.
O combinado nacional goleou (1-5) esta mañá á anfitrioa, República Checa, no Estadio Domazlice, na localidade checa de Domazlice, en choque pertencente á segunda xornada da Primeira Fase. A capitá do Deportivo Abanca disputou o seu segundo partido completo neste Europeo.
Tere Abelleira debutou o pasado martes 2 de maio coa Selección Española. A centrocampista branquiazul tamén foi titular, aínda que nesta ocasión non puido evitar a derrota das españolas ante a vixente campioa, Alemaña (1-4), máis certeira ao contragolpe.
O vindeiro luns, España mídese a Francia na terceira e última xornada desta Primeira Fase da competición. O partido arrancará ás 14:00 en Prestice.
O calendario de España, cos resultados, é o seguinte:
Martes 2 de maio ESPAÑA 1 - ALEMAÑA 4
Venres 5 de maio REPÚBLICA CHECA 1 - ESPAÑA 5
Luns 8 de maio 14:00: FRANCIA - ESPAÑA (no Estadio Prestice, en Prestice)
Os dous primeiros de grupo pasan a semifinais, que se xogarán o 11 de maio.