O Deportivo, ademais co meta xuvenil Alberto, realizou esta mañá o seu segundo adestramento consecutivo en ABANCA-RIAZOR, após o de onte venres no mesmo escenario.
José Luis Martí tenta reforzar o estado anímico dos seus futbolistas, moitos dos cales xa cualifican en sala de prensa como "unha fase previa ao play off" estes últimos partidos ligueiros, por exemplo Álex Bergantiños ou Dani Giménez nas súas comparecencias públicas desta semana.
Por conseguinte, o técnico deportivista dedicou máis da primeira media hora da sesión a xogos sen balón polo medio. Houbo risas, bromas e compañeirismo, sen esquecer nunca o aspecto competitivo.
Un exercicio de posesión e un partido a tres cuartas partes de campo completaron o traballo sobre o céspede, ao redor de 75 minutos.
Só Kronh-Dehli traballou á marxe do grupo, co readaptador Fran Molano.
Mañá domingo, o cadro deportivista está citado ás 09:30 para almorzar en Abegondo e, a continuación, realizar unha última sesión antes do choque de mañá mesmo no Anxo Carro ante o CD Lugo (20:00 horas, LaLiga 1|2|3 TV).
Nada máis concluír ese suave adestramento, José Luis Martí dará a lista de convocados que se desprazarán á cidade lucense, segundo esta folla de ruta:
Domingo 19 de maio
10:30: Adestramento en Abegondo
11:30: Saída da Cidade Deportiva con destino Lugo
12:30: Chegada e aloxamento no Eurostars Gran Hotel de Lugo
20:00: CD Lugo - Deportivo, no Anxo Carro
Ao finalizar traslado a Coruña
