O deportivismo envorcouse coas caras novas do primeiro equipo para a recentemente comezada Temporada 2017-2018, que foron presentadas esta tarde no Estadio ABANCA-RIAZOR ante máis de 6.000 enfervorizados seguidores.
Xa desde as 17:30 horas, os afeccionados apiñábanse nas dúas portas de Tribuna habilitadas para a ocasión, e que foron abertas ás 18:00. A bancada principal do estadio encheuse practicamente na súa totalidade, tanto o seu anel Inferior como o Superior.
Ás 7 da tarde, Gerard Valentín, Fabian Schär, Fede Valverde, Adrián López, Fede Cartabia, Lucas Pérez, Guilherme dos Santos, Zakaria Bakkali e Costel Pantilimon (a única ausencia foi a de Carles Gil, de permiso con motivo do preoperatorio para a cirurxía á que será sometido o vindeiro luns) entraron no estadio en varios Mercedes cedidos por Louzao, un dos patrocinadores do RC Deportivo.
Posteriormente, vestíronse de curto e saltaron ao terreo de xogo, presentados un a un, desde o túnel de vestiarios. Despois de saudar aos afeccionados, lanzaron balóns e achegáronse á bancada a asinar a todos os seguidores que llo pediron.
