O cadro do Deportivo dividiuse esta mañá en tres grupos na habitual sesión de traballo post-partido.
Así, os titulares onte no campo de Miramar en Luanco tiveron tarefas de recuperación entre o céspede, o ximnasio e a padiola dos fisioterapeutas.
Para os demais membros do cadro, incluídos os fabrilistas Adri Castro e Alberto, a mañá foi de alta intensidade, cunha tarefa de posesión; un exercicio de centros e remates; e fútbol reducido para concluír. A este grupo incorporáronse tamén Celso Borges e Salva Ruiz, que disputaron unicamente os primeiros 45 minutos ante o Marino de Luanco.
Finalmente, os lesionados Derik Osede, Keko, Borja Galán e Claudio Beauvue tiveron adestramento á carta. Os dous primeiros no ximnasio, no caso de Keko pendente de probas médicas dos seus isquiotibiais da perna dereita; e os dous últimos tamén sobre o céspede co readaptador, Fran Molano. Claudio Beauvue está pendente da evolución das súas molestias no xeonllo dereito que lle impediron entrar na convocatoria da pasada fin de semana.
Mañá martes haberá xornada de descanso. O equipo volve aos adestramentos o mércores 28 de abril ás 10:30 en Abegondo para empezar a preparar a seguinte cita no grupo 1D de Segunda División B, a visita do UP Langreo a ABANCA-RIAZOR prevista para o domingo 2 de maio ás 19:00 horas (TVG).
