O Deportivo caeu derrotado no Ramón Sánchez Pizjuán, nun partido marcado pola primeira media hora de xogo, na que o Sevilla se adiantou ata en tres ocasiones despois de que Gaël Kakuta empatase para os coruñeses en dúas oportunidades.
O adestrador do RC Deportivo, Pepe Mel, realizou dous cambios con respecto ao equipo titular do pasado mércores fronte ao Granada en Riazor. Gaël Kakuta, recuperado da súa lesión, ocupou a posición do 'tocado' Carles Gil. A outra permuta produciuse na dianteira, onde Joselu, ausente fronte ao conxunto nazarí por sanción, supliu a Florin Andone.
Tardou 54 segundos o Sevilla en adiantarse no marcador. Practicamente sen que o Dépor chegase a tocar a pelota, Stevan Jovetić bateu a Germán Lux tras un servizo desde a esquerda de Steven N'Zonzi.
Con todo, ían exactamente 183 segundos de partido cando os branquiazuis, hoxe de camiseta e pantalón negros e medias brancas, equilibraban a balanza. Joselu anticipouse a Nico Pareja na área, o balón saíu rexeitado a pés de Kakuta, o franco-congoleño tirou un autopase para desbordar a Mariano e bateu a Sergio Rico cun zurdado cruzado por baixo. Foi o primeiro tanto co Deportivo do internacional coa República Democrática do Congo.
Antes do minuto 10, o Sevilla volvía porse por diante. Sergio Escudero disparou desde o extremo esquerdo. Lux rexeitou cara ao centro da área, onde se atopaba Pablo Sarabia para mandar o balón ao primeiro toque ao fondo das mallas.
Para completar a tolemia inicial, Juanfran debeu abandonar o terreo de xogo por lesión, deixando o seu sitio a Laure no minuto 12.
Cunha durísima pero mal dirixida volea de Kakuta a centro de Marlos Moreno e un disparo alto de Franco Vázquez tras unha recuperación de Mariano na área deportivista diluíuse o cento por cento de efectividade de ambos os equipos, á vez que se alcanzaba o cuarto de hora.
Tras dez minutos de respiro, Pareja cometeu unha man na media lúa da área que proporcionou ao Dépor unha gran oportunidade. Guilherme e Kakuta perfiláronse para lanzala, pero fíxoo finalmente o franco-congoleño, que calcou o golazo que marcou no recente debut coa súa selección para volver empatar o encontro, no minuto 25. Kakuta incrustou o esférico no vértice superior esquerdo do marco dun Sergio Rico que non puido facer nada para evitalo.
Volveu durar pouco a alegría para o Dépor, pois sete minutos despois, Joaquín Correa peiteaba unha falta botada desde a esquerda por Sarabia, para bater a Lux por terceira vez.
No minuto 38, o Sevilla perdoou a oportunidade de facer o cuarto gol. Franco Vázquez rematou ao poste dereito da portería de Lux. O balón caeu a pés de Jovetić que, a porta baleira, tirouno fóra.
No minuto 42, o colexiado omitiu un claro penalti por mans de Franco Vázquez, cando o arxentino se anticipaba a Sidnei despois de que o brasileiro tiráselle un sombreiro á saída dun córner.
A segunda metade non tivo nada que ver coa primeira. O ritmo baixou. Os desaxustes defensivos e a precisión nas accións de ataque desapareceron.
Ata superado o cuarto de hora non se produciu un disparo entre o tres paus. Fíxoo o Sevilla, por medio de Escudero, nunha falta lonxana que Lux desviou a saque de esquina.
No minuto 62, Ola John, recentemente ingresado no terreo de xogo en lugar de Marlos Moreno, reclamou un penalti por empuxón de Mercado, despois de sentar ao defensa arxentino cun fantástico regate. Pouco despois, Joselu rematou de volea un centro do internacional holandés, aínda que o coiro chegou mansamente ás mans de Sergio Rico.
A falta de vinte minutos para a conclusión, Pepe Mel introduciu no terreo de xogo a Andone en lugar de Emre Çolak, pasando a xogar cun 4-4-2 con dous extremos puros como Kakuta e Ola John. Jorge Sampaoli, preparador sevillista, respondeu introducindo a un defensa central, Clément Lenglet, en lugar dun centrocampista, Franco 'Mudo' Vázquez.
No minuto 77, Vicente Iborra foi incapaz de bater a Lux nunha dobre ocasión tras un servizo de Jovetić desde a dereita. Na segunda ocasión, o centrocampista do Sevilla enviou o esférico ás mans do porteiro deportivista cando se atopaba sentado no chan tras lanzarse para deter o primeiro remate.
Cinco minutos máis tarde, Lux evitou o 4-2 cunha sensacional parada, nunha acción na que Wissam Ben Yedder plantouse só ante o gardameta branquiazul. Ese gol chegou pouco máis tarde, cando se achegaba o final do partido, por medio do propio Ben Yedder. Un gol que non debeu subir ao marcador pois o dianteiro francés atopábase en posición de fóra de xogo.
Tras esta nova derrota, o Deportivo continúa con 28 puntos, seis por riba da zona de descenso á espera de que mañá xoguen os catro equipos que se atopan por baixo na clasificación: Leganés, Sporting de Gijón, Granada e Osasuna.
Sevilla FC: Sergio Rico, Mariano, Pareja, Mercado, Escudero, Franco Vázquez (Lenglet, min. 76), Kranevitter, N'Zonzi (Iborra, min. 74), Sarabia, Joaquín Correa (Ben Yedder, min. 65) e Jovetić.
RC Deportivo: Lux, Juanfran (Laure, min. 12), Arribas, Sidnei, Luisinho, Borges, Guilherme, Marlos Moreno (Ola John, min. 58), Emre Çolak (Andone, min. 72), Kakuta e Joselu.
Goles: 0-1 Jovetić (min. 1); 1-1 Kakuta (min. 4); 2-1 Sarabia (min. 9); 2-2 Kakuta (min. 25); 3-2 Correa (min. 32); 4-2 Ben Yedder (min. 88).
Árbitro: Jaime Latre (c. aragonés). Cartón amarelo a Luisinho (min. 26), Escudero (min. 27), Kranevitter (min. 45), Arribas (min. 60), Jovetić (min. 67) y Joselu (min. 87).
Incidencias: partido correspondente á 31ª jornada de LaLiga Santander disputado no estadio Ramón Sánchez Pizjuán ante 33.022 espectadores.
