O Deportivo ABANCA recupera á gardameta Esther Sullastres para a visita ao UD Granadilla Egatesa Tenerife prevista para este martes 5 de xaneiro ás 12:00 (11:00 hora insular, LaLiga Sports TV) no campo da Palmeira en San Isidro.
Precisamente sobre a gardameta, que estivo ausente varias semanas por unhas molestias nun ombreiro, indicou Manu Sánchez onte en rolda de prensa que xa no primeiro adestramento após o Nadal "traballou ao cento por cento. Véselle moi enchufada".
Por contra, é baixa Kika, con molestias nun cuádriceps. O adestrador branquiazul xa advertiu ante os medios de comunicación que despois das vacacións sempre "poden aparecer molestias musculares, sobrecargas..." E por este motivo prefire ser cauto sobre o rendemento físico do cadro.
En fronte estará esta vez un UD Granadilla Tenerife Egatesa empolicado todo o máis alto da clasificación. As insulares suman 27 puntos en 13 partidos disputados. Só supéranas na táboa o Atlético de Madrid (cos mesmos puntos), Real Madrid (28 puntos) e FC Barcelona (30 puntos aínda que con tres partidos menos xogados". Un rival pois de altísimo nivel para un Deportivo ABANCA en liña ascendente en xogo e resultados, pero que aínda pecha provisionalmente a táboa da categoría con 7 puntos en 12 partidos disputados.
O equipo deportivista viaxa mañá luns con esta folla de ruta:
Luns 4 de xaneiro
12:25: Saída do voo de Santiago con destino ao Aeroporto de Tenerife Norte
14:05 (hora insular): Chegada aproximada a Santa Cruz de Tenerife e traslado ao hotel NH Tenerife
17:00 (hora insular): Adestramento na Cidade Deportiva do CD Tenerife
Martes 5 de xaneiro
11:00 (hora insular, 12:00 na Coruña): UD Granadilla Tenerife Egatesa - Deportivo ABANCA, no campo da Palmeira en San Isidro
15:05 (hora insular): Saída do voo do Aeroporto de Tenerife con destino ao Aeroporto de Madrid - Adolfo Suárez
19:40: Saída do voo do Aeroporto de Madrid - Adolfo Suárez con destino ao Aeroporto da Coruña
21:00: Chegada aproximada ao Aeroporto da Coruña
O cadro regresa aos adestramentos o xoves 7 de xaneiro ás 17:30 en Abegondo.
