O Xuvenil A, que brillantemente deixou na cuneta ao campión do grupo 2 da División de Honra, o Osasuna, entrará mañá martes 23 de maio no bombo do sorteo dos cuartos de final da Copa do Rei, que terá lugar ás 12:30 horas na Ciudad del Fútbol de Las Rozas (Madrid).
O equipo que adestra Rubén Coméndez venceu ao conxunto navarro por 2-0 en Abegondo no encontro de ida, repetindo éxito na volta, en Tajonar, este domingo, cun triunfo por 0-1.
Os posibles rivais do Xuvenil A son Atlético de Madrid, Celta, Real Madrid, Mallorca, Sevilla, Villarreal e Barcelona. Os partidos de ida disputaranse a vindeira fin de semana (27 e 28 de maio) e os de volta, os días 3 e 4 xuño.
