O Real Club Deportivo activa, dentro das esixencias da actual situación sanitaria, o protocolo de apertura con aforo reducido da Cidade Deportiva de Abegondo para o partido de División de Honra xuvenil do domingo 7 ás 12:00 horas entre o Dépor e o Celta.
Poden optar a unha das invitacións dispoñibles todos os Socios do Real Club Deportivo que o soliciten formalmente a través do correo electrónico atencion.deportivista@rcdeportivo.es, no que deberán enviar os seus datos: nome, apelidos, número de socio e DNI.
Este procedemento ten dous fins: poder realizar a confirmación da invitación notificando ao socio que ten dereito de acceso á Cidade Deportiva e, ademais, levar un control de repartición en atención á normativa sanitaria de seguimento da COVID-19.
Dado o escaso número de localidades dispoñibles, o Real Club Deportivo roga encarecidamente que unicamente soliciten invitación aqueles Socios que vaian poder acudir ao partido, para evitar que queden entradas sen utilizar.
A solicitude formal debe realizarse entre a publicación desta normativa e o sábado 6 de marzo ás 14:00 horas, momento no que se pechará o prazo de solicitudes de entradas para un novo partido de #AsNosaCanteira en Abegondo.
Posteriormente ao peche do prazo de solicitudes notificarase, vía correo electrónico, a aqueles que sexan adxudicatarios dunha invitación, que dispoñen de entrada e o método de acceso á Cidade Deportiva, lembrando que antes de desprazarse a Abegondo deben comprobar se poden viaxar até as instalacións desde os seus lugares de residencia.
Todos os asistentes deberán ocupar obrigatoriamente a fila e asento asignado para poder ter a todos os afeccionados localizados en caso de rastrexo por COVID-19.
Tamén por protocolo COVID cada asistente deberá pasar un control de temperatura, higienizar as súas mans, portar máscara en todo momento, sentar obrigatoriamente na localidade asignada no punto de control de accesos (estará identificada cun adhesivo verde de ASENTO DISPOÑIBLE) e permanecer na devandita localidade sentado até finalizar o partido (unicamente permítense desprazamentos aos baños. Non haberá servizo de bar nin está permitido introducir e consumir alimentos ao interior da Cidade Deportiva), respectando en todo momento a distancia de seguridade de 1,5 metros nos controis de acceso e durante a permanencia no interior da instalación.
