Pepe Mel dividiu esta mañá ao primeiro cadro en dous grupos, no único adestramento previsto para hoxe mércores 26 de xullo.
Para todos houbo un traballo preventivo no ximnasio e un exercicio de posesión con porterías, neste caso no campo 2.
A continuación, os titulares onte Pasarón no Trofeo Luis Otero, incluído Bakkali, que relevou a Andone ao cuarto de hora de xogo, tiveron recuperación, con masaxe e ximnasio.
Os demais realizaron diversos exercicios de fútbol, en espazo reducido, para completar unha mañá de alta intensidade para este grupo.
Quedaron no vestiario Carles Gil; Florin Andone, cunha contusión no sóleo; e Bruno Gama, cun golpe na cadeira; estes dous últimos do partido de onte en Pontevedra.
Luisinho, que sufriu o pasado luns unha contusión no xemelgo que lle impediu estar onte a disposición de Pepe Mel, realizou xa unha parte do adestramento co grupo.
Mañá xoves, o equipo adestrarase en Abegondo ás 10:00 horas. Tras a comida no Hotel Tryp (13:30 horas), o Dépor pelexará pola tarde en Ferrol (20:00 horas) ante o Racing polo Trofeo Concepción Arenal, que este ano alcanza a súa 56ª edición.
A directiva do Club racinguista fixou os seguintes prezos:
-Tribuna: 15 euros
-Preferencia: 12 euros
-Bancada de fondo: 10 euros
-Menores de 12 anos: 1 euro en calquera bancada
