Os xogadores do Dépor inician unha segunda etapa nas súas vacacións, xa con adestramento personalizado
Os futbolistas do primeiro cadro iniciaron o pasado 20 de maio, tras o partido ante a UD Las Palmas en Riazor, as súas vacacións de verán, que se prolongarán ata o 5 de xullo.
Cada un dos xogadores, excepto os tres porteiros e os lesionados (Joselu e Luisinho), marchouse cun plan de traballo individualizado, deseñado polos preparadores físicos branquiazuis.
O obxectivo é que o xogador chegue nun estado de forma adecuado para afrontar a próxima temporada e evitar os contratempos físicos á hora de soportar o duro traballo de pretemporada.
Así, a partir de hoxe luns 12 de xuño, os futbolistas terán que realizar un traballo diario, consistente en:
-Exercicios de forza tres días por semana: os luns (12, 19 e 26 de xuño); mércores (14, 21 e 28 de xuño); e venres (16, 23 e 30 de xuño): flexións, abdominais, traballo de glúteos, cuádriceps, isquiotibiais, adductores...
-Traballo de resistencia mediante carreira continua e intermitente (variando a intensidade), de luns a venres a partir de hoxe 12 de xuño ata o 30 de xuño; e con só o mércores 14 de xuño como descanso.
Ata onte domingo 11 de xuño houbo descanso total, para recuperarse de todo o traballo realizado durante a temporada. Os preparadores físicos, iso si, aconsellaron realizar deportes alternativos.
Ademais, o corpo técnico fíxolles chegar unha serie de recomendacións:
-Respectar as horas de descanso, entre 8 e 10 horas ao día.
-Coidar o peso, fundamental para evitar lesións e aguantar o ritmo de traballo durante o verán. A cada futbolista pídeselle que regrese co seu peso ideal.