Esta tarde presentouse na sede central de Abanca na Coruña a segunda parte de Imposible sen ti, a campaña institucional do Real Club Deportivo, Real Club Celta e Abanca, en favor da concordia no derbi galego. No acto estiveron presentes os técnicos de ambos os equipos: Pepe Mel e Eduardo Berizzo, e dous dos xogadores galegos, o capitán branquiazul Álex Bergantiños e o porteiro de Mos Rubén Branco.
O anuncio é o desenlace do presentado con motivo do derbi da primeira volta en Balaídos no que un pai e un fillo rivalizan pola súa afección ao Dépor e ao Celta. Álex Bergantiños recoñeceu sentirse identificado coa historia, moi habitual en Galicia e que reflicte "o que somos os galegos. Eu teño familia en Vigo e síntome recoñecido, estamos moito máis unidos do que parece", afirmou. "Nos últimos anos entendemos que o derbi é un espectáculo que hai que exportar a todo o mundo".
Pola súa banda, Pepe Mel afirmou que "estes son os partidos que hai que gozar. Os derbis cambiaron moito dentro e fóra do campo. Seguimos tentando vencer ao noso rival deportivo, pero as formas, o como, tamén importa. Todos temos que ser un exemplo, desde a directiva, que xa o son, ata os xogadores. O partido debe ser noticia no mundo porque os dous equipos máis importantes de Galicia dan un exemplo de saber estar".
Para Eduardo Berizzo, "cando un crece recoñece na competitividade unha lealdade co seu rival e cun mesmo. Neste momento podemos falar dun clásico galego vivido nunha atmosfera de cordialidade entre dous equipos fortes. A violencia foi desterrada", mentres que para Rubén Branco, o derbi "é unha festa do fútbol galego, nós gozámolo desde dentro e a afección debe vivilo como unha festa".
