William por Menudo foi o mínimo axuste que realizou Borja Jiménez con respecto ao precedente ligueiro de hai unha semana en ABANCA-RIAZOR co filial do Athletic Club para afrontar un partido de rivalidade provincial que se axustou ao guion habitual deste tipo de partidos: pouco fútbol, máxima igualdade, tensión e algunha polémica.
O pouco fútbol, polo menos para a vistosidade dos espectadores, traduciuse en escasas ocasións nas áreas, especialmente na local. Para ver a primeira do partido houbo que esperar ao minuto 13 cun rexeite na frontal que recibiu Quiles e rematou con rosca alto. Ás mans de Gazzaniga foise un centro de Miku antes de que o Racing dispuxese das ocasións máis claras do partido recentemente cumprido o cuarto de hora: Dani Nieto entrando na área obrigou a un paradón abaixo de Mackay para mandar a córner, á saída do cal Pumar de volea volve obrigar a Ian a voar para salvar o primeiro tanto do partido.
Unha falta perigosa para o Racing con amoestación a Lapeña, que se perderá o próximo partido contra o Valladolid B por acumulación de cartóns, freouse contra a barreira antes de chegar ás mans de Mackay.
Quiles protagonizou outras dúas boas chegadas, a primeira un remate alto de cabeza a falta forzada e lanzada por William e despois en liña de fondo, saíndo da esquina marchándose de dous defensas e querendo ceder á chegada de Villares, pero anticipándose a defensa na xogada de máis calidade individual do encontro.
Dani Nieto, lixeiramente desviado, puxo o epílogo ao primeiro tempo que acumulou todas as ocasións do partido. Na reanudación só un remate alto de David Rodríguez a centro de Miguel Loureiro, outro de Kevin Presa desviado e por último un bo pase de Yeremay para Héctor e o centro que Quintana salva coa cabeza. No segundo córner consecutivo desa xogada, Lapeña rematou co calcaño pero marchóuselle desviado.
Quedará para o recordo do encontro o sucedido no minuto 86, tres minutos despois de que o futbolista brasileiro Nathan rematase alto unha deixada atrás dunha contra conducida por Heber. Nunha saída de xogada a balón parado, Álex despexou xusto detrás da carioca e o colexiado, ante a sorpresa do capitán e de todos os deportivistas, sinalou penalti. Puido ser a sentenza ao partido, pero Dani Nieto estrelouno no traveseiro. O rexeite, após botar, quedou na cabeza de Nathan que anotou gol, pero o árbitro anulouno sen que ningún dos xogadores nin espectadores do partido tivera claro que pasou nin antes do penalti nin despois.
Era o ingrediente que lle faltaba a un partido que tivo todo o que se espera de encontros deste tipo e que acabou como empezou, co ánimo dos 1.000 espectadores ao equipo, como sucedera á chegada do bus á cidade departamental.
Racing Club de Ferrol: Gazzaniga, Loureiro, Fornos, Quintana, Pumar, Manzanara, Kevin Presa (Álex López, min. 78), Dani Nieto, Alayeto, David Rodríguez (Heber, min. 72) e Joselu (Nathan, min. 72)
RC Deportivo: Mackay, Víctor García, Lapeña, Jaime, Héctor, Álex, Villares (Yeremay, min. 62), Juergen (Rafa de Vicente, min. 87), William (Mario Soriano, min. 87), Quiles e Miku (Noel, min. 72)
Árbitro: Pozueta Rodríguez (c. cántabro). Amoestou a Lapeña (min. 25), Jaime (min. 61), Fornos (min. 68), Álex López (min. 86), Heber (min. 86), Quiles (min. 88) e Nathan (min. 94)
Incidencias: partido da 15ª xornada da Primeira RFEF Footters disputado no Estadio da Malata con 1.000 espectadores do RC Deportivo nas bancadas
