O Deportivo pechou esta semana sen fútbol de competición oficial cun adestramento suave en Abegondo.
Cos canteiráns Francis, Álex Cobo, Edu Expósito e Ramón, o cadro branquiazul realizou rondos e un exercicio de fútbol en espazo reducido.
A partir de aquí, os futbolistas que onte xogaron de inicio ante o Corinthians no Memorial Moncho Rivera (Gerard, Arribas, Albentosa, Navarro, Çolak, Edu, Bakkali, Bruno Gama e Borja Valle) realizaron tarefas de recuperación.
O resto de xogadores completou o adestramento cun circuíto con remates a portaría.
Adestráronse á marxe do grupo Rubén, Adrián López, Pedro Mosquera e Carles Gil. Lucas tampouco saltou ao céspede. Dada a mala evolución das súas molestias no cuádriceps esquerdo, o dianteiro coruñés está a ser sometido a probas médicas complementarias.
Mañá sábado e o domingo haberá xornada de descanso. O equipo volve aos adestramentos o luns 9 ás 18:30 en Abegondo, xa coa mente posta na 8ª xornada ligueira, en Eibar o domingo 15 de outubro (12:00 horas, Bein LaLiga).
