O triunfo do Alevín A ante o Ural Español CF A (5-1), que supuxo ademais o título do grupo A da Primeira Autonómica A Coruña de fútbol oito, abriu o pasado xoves 3 de xuño o calendario de partidos en #ANOSACANTEIRA.
Co Deportivo ABANCA B, Cadete B e Infantil B xa sen competición oficial despois de finalizar os seus respectivos grupos ligueiros, o partido máis interesante da fin de semana en #ANOSACANTEIRA foi o derbi na División de Honra cadete entre o Dépor e o Celta, hoxe domingo 6 de xuño en Abegondo, con motivo da primeira xornada na segunda fase, subgrupo A2.
Nun choque equilibrado entre os dous grandes aspirantes ao título, houbo táboas (1-1), resultado co que o Cadete A mantén todas as súas opcións.
O formato de competición é de liga a unha soa volta. Os dous primeiros accederán ás semifinais, cuxos vencedores xogarán a gran final a partido único en sede neutral.
Tamén arrancou con claro triunfo (7-0) a segunda fase da Liga Galega o Infantil A, neste caso onte sábado en Abegondo fronte ao Victoria FC de Santiago. Do mesmo xeito que en categoría cadete, o formato de competición é de liga a unha soa volta. O primeiro pasará á semifinal, a partido único; e o vencedor xogará a gran final.
E finalmente retomouse para o Xuvenil B a segunda fase da Liga Nacional. O conxunto dirixido por Alejandro Antón e Aldo Duscher igualou (1-1) co Coruxo FC onte sábado 5 de xuño, en partido correspondente á 4ª xornada (penúltima) aprazado no seu día por COVID-19 no vestiario deportivista.
Con este resultado, ao Xuvenil B válelle un empate o vindeiro domingo 13 de xuño ás 12:00 en Abegondo ante o RC Celta B para lograr o título de campión da categoría.
Tiveron descanso esta fin de semana o Alevín de fútbol once; ademais do Benxamín A e o Fabril FC Benxamín en fútbol oito.
Os resultados da fin de semana foron os seguintes:
Categoría xuvenil
Segunda fase da Liga Nacional, grupo 1C de ascenso, 4ª xornada: CORUXO FC 1 - XUVENIL B 1 (Martín Ochoa)
Categoría cadete
División de Honra, segunda fase, grupo A2, 1ª xornada: CADETE A 1 (Álex Delgado) - RC CELTA 1
Categoría infantil
Liga Galega, segunda fase, grupo norte A1, 1ª xornada: INFANTIL A 7 (André, Brian -2-, Rubén, David e Daniel -2-) - VICTORIA FC 0
Categoría alevín
Primeira Autonómica A Coruña de fútbol oito, grupo A, 6ª xornada (xogado o pasado xoves): ALEVÍN A 5 (Paulo -3-, Nico e Trigo) - URAL ESPAÑOL CF 1
Amigable (xogado o pasado xoves): FABRIL FC ALEVÍN 9 (Raúl, Pablo Vara, Guille, Jose, Gabi -2-, Martín Forján, Iago Lameiro e un futbolista rival en propia meta) - ATLÉTICO ARTEIXO 2
