O buque insignia de #ANOSACANTEIRA, o Xuvenil A, continúa dando alegrías ao deportivismo ao clasificarse este mediodía no Anexo ao Estadio de Gran Canaria para as semifinais da Copa de Campións da División de Honra.
Após un partido igualado que ben puido caer para calquera dos dous bandos, os pupilos de Óscar Gilsanz perderon (2-1) ante a UD Las Palmas ao final do tempo regulamentario e da prórroga, o mesmo resultado do partido de ida disputado en Abegondo pero a favor dos deportivistas. Nos penaltis, o Xuvenil A, apoiado no seu meta Brais, estivo máis acertado e levou o triunfo (1-3).
Un novo éxito deste equipo que superou ao longo de case 11 meses de competición varias dificultades, como foron un confinamento por COVID-19 e como foron as ausencias continuas cada xornada de futbolistas citados ben polo Fabril ou ben polo primeiro equipo, caso de Brais, Trilli, Dani Barcia, Guille Bueno, Yeremay, Padín ou Jairo.
Tamén hoxe na Torre, o Benxamín A impúxose ao Atlético Coruña Montañeros CF A (0-2) na segunda xornada da segunda fase da Primeira Autonómica A Coruña de fútbol oito. Con este resultado, os branquiazuis son campións.
Nesta competición tamén participa o Fabril FC Benxamín, que tivo xornada de descanso despois do partido disputado o pasado xoves ante o Benxamín A na primeira xornada e que se saldou co lóxico triunfo deste último (6-0).
Onte sábado na Cidade Deportiva branquiazul, o Cadete A (2-2 ante o San Tirso SD) e Infantil A (7-1 fronte ao CD Lugo) selaron o pase ás semifinais da División de Honra e Liga Galega respectivamente na última xornada da segunda fase.
Ademais, no campo Víctor Fernández Alonso (antigo campo da Leyma), o Alevín venceu (6-0) ao Atlético Coruña Montañeros CF na semifinal da Primeira Autonómica A Coruña de fútbol once. O Victoria CF A será agora o rival na final.
Os alevíns e os benxamíns do Deportivo foron os protagonistas o pasado xoves 17 de xuño no campo de herba sintética de Abegondo no arranque da xornada semanal en #ANOSACANTEIRA.
Ademais do citado choque entre o Benxamín A e o Fabril FC Benxamín, o Alevín A impúxose (3-1) ao Fabril FC Alevín na gran final da Primeira Autonómica A Coruña de fútbol oito. Ambos os conxuntos chegaron a este partido após ser campións dos seus respectivos subgrupos.
Os resultados da fin de semana foron os seguintes:
Categoría xuvenil
Copa de Campións, cuartos de final, volta: UD LAS PALMAS 2 - XUVENIL A 1 (Noel); 1-3 na quenda de penaltis. Na ida: 1-2
Categoría cadete
División de Honra, segunda fase, grupo A2, 3ª xornada: SAN TIRSO SD 2 - CADETE A 2 (Álex Delgado e Marco Baña)
Categoría infantil
Amigable (xogado o pasado mércores): SAN TIRSO SD B (cadete) 3 - INFANTIL A 4 (José Rey -2-, Jairo e Jhonny)
Liga Galega, segunda fase, subgrupo A1 norte, 3ª xornada: INFANTIL A 7 (José Rey -3-, Rubén -2-, Daniel e Samuel) - CD LUGO 1
Categoría alevín
Primeira Autonómica A Coruña de fútbol once, semifinal: ALEVÍN 6 (Paulo -4-, Uxío e Nico) - ATLÉTICO CORUÑA MONTAÑEROS CF 0
Primeira Autonómica A Coruña de fútbol oito, final (xogado o pasado xoves): ALEVÍN A 3 (Paulo -2- e Gael) - FABRIL FC ALEVÍN 1 (Guille)
Categoría benxamín
Primeira Autonómica A Coruña de fútbol oito, Fase Final, 1ª xornada (xogado o pasado xoves): BENXAMÍN A 6 (Íker -3-, Mario, Yael e Thiago) - FABRIL FC BENXAMÍN 0
Primeira Autonómica A Coruña de fútbol oito, Fase Final, 2ª xornada: ATLÉTICO CORUÑA MONTAÑEROS CF A 0 - BENXAMÍN A 2 (Thiago e Nico)
