Fabian Schär, titular onte no Portugal-Suíza de Lisboa, chegou á primeira hora á Coruña e realizou tarefas de recuperación no ximnasio e o vestiario da Cidade Deportiva de Abegondo.
Dos internacionais, faltan unicamente Celso Borges e Fede Valverde, que esta pasada madrugada xogaron en Panamá e Montevideo respectivamente. O Club espera que ao longo de mañá xoves estean de regreso na Coruña.
Hoxe exercitáronse á marxe Adrián, Lucas, Carles Gil e Rubén. Pedro Mosquera realizou xa o quecemento co grupo, e dá un paso máis na súa recuperación.
Para o resto do cadro, cos fabrilistas Francis, Óscar, Edu Expósito e Martín Bengoa, Pepe Mel incidiu en exercicios defensivos. Un partido de área a área, nove contra nove, puxo o punto e final ao traballo sobre o céspede.
Mañá xoves, o equipo adestrarase de novo en Abegondo ás 10:30 horas.
