- Foto: www.fifa.com -
Silvia Mérida Ramírez (Benalmádena-Málaga, 14 de xaneiro de 1998) é nova xogadora do Deportivo Abanca, cara á segunda temporada da súa historia, na que militará novamente no grupo 1 de Segunda División Nacional.
Defensa central de 1,68 metros e 66 quilos, Silvia Mérida procede do Sporting Huelva, co que alcanzou a décima praza na recentemente finalizada Liga Iberdrola. Con anterioridade formou parte dos cadros do Madrid CFF (2014-2015) e Atlético de Madrid B (2015-2017).
Silvia Mérida conta cunha ampla experiencia nas categorías inferiores da selección española, nas que é unha habitual desde que empezou na Sub-16 ata as súas recentes chamadas co combinado Sub-19.
A xogadora malagueña disputou o Mundial Sub-17 de 2014 en Costa Rica, no que a selección española alcanzou a final. Xapón derrotou no partido polo título ao equipo español, no que formou Silvia Mérida, que xogou os seis encontros daquel torneo.
Igualmente, a defensora andaluza formou parte da selección española Sub-17 nos Campionatos de Europa da categoría de 2013 e 2014. No primeiro deles, disputado en Suíza, España alcanzou a terceira praza. Un ano máis tarde, en Inglaterra, o equipo español caeu na final ante Alemaña, na quenda de penaltis.
Con esta incorporación, o Deportivo Abanca xa conta con 15 xogadoras cara á Temporada 2017-2018: Anita, Estefi, Miriam, María Corral, Nuria, Raquel, Tere Abelleira, Kika Moreno, Gaby García, Cris, Lía, Malena, Miga, Gere e Silvia Mérida.
