Xa advertiu en varias das súas comparecencias públicas Rubén de la Barrera, técnico deportivista, que non quería altibaixos no equipo segundo os marcadores dos partidos.
Con esta premisa, e rota onte ante o CD Guijuelo a dinámica de malos resultados, o Dépor regresou aos adestramentos esta mañá en Abegondo coa súa rutina habitual.
Os titulares onte en ABANCA-RIAZOR adestráronse á marxe do grupo, con traballo de mobilidade, roldo e tarefas de recuperación no vestiario. A este grupo uniuse o fabrilista Adri Castro, que xogou onte no Poboado das Pontes co filial deportivista.
Para os deportivistas que non actuaron de inicio, incluído o meta fabrilista Alberto, a mañá foi de alta intensidade. Houbo roldo, unha tarefa de posesión, un exercicio de transicións ofensivas e, para concluír, fútbol en espazo reducido. Case hora e media de sesión supervisada por Rubén de la Barrera. Keko exercitouse no ximnasio, con adestramento específico; ademais de Miku, o único xogador do cadro a día de hoxe con molestias físicas.
Mañá martes 16 de febreiro haberá xornada de descanso. O Deportivo regresa á Cidade Deportiva o mércores 17 ás 10:30 horas para comezar a preparar a seguinte cita ligueira, a visita ao Racing de Ferrol prevista para o sábado 20 de febreiro ás 19:00 na Malata (TVG).
