Natxo González incrementou a intensidade do adestramento esta mañá en Abegondo.
O técnico deportivista dispuxo como tarefa principal do día un exercicio de fútbol reducido, de alta intensidade.
A mañá arrancou na sala de vídeo por espazo de hora e media. Tal e como subliña cada futbolista cando pasa pola sala de prensa, toca nestes días analizar erros para corrixilos este domingo 20 de xaneiro en ABANCA-RIAZOR ante o Albacete Balompié (18:00 horas, Movistar Partidazo), en partido correspondente á 22ª xornada en LaLiga 1|2|3.
Adestráronse á marxe do grupo Carlos Fernández, Pedro Sánchez e Christian Santos, que hoxe traballou co readaptador Fran Molano debido a unhas molestias nun sóleo que sufriu onte.
Michael Krohn-Dehli retirouse antes de tempo aos vestiarios a consecuencia dunhas molestias nun xemelgo, pendente de avaliación médica.
Mañá xoves, o cadro está citado de novo en Abegondo ás 11:00 horas.
