O RC Deportivo activa o protocolo de apertura con rexistro de asistentes da Cidade Deportiva de Abegondo para o partido deste domingo 12 de maio ás 12:00 (Youtube RC Deportivo) entre o Xuvenil A branquiazul e o Sevilla FC, correspondente á ida dos cuartos de final da Copa de Campións de División de Honra Xuvenil.
Poden retirar entradas dispoñibles, até esgotar as localidades e sen ningún custo adicional, todos os socios e socias do RC Deportivo que o tramiten formalmente a través da web bancada.rcdeportivo.es, na que deberán introducir o seu ID de socio e os 4 últimos números do DNI. A continuación, seleccionar un asento e posteriormente completar os seus datos de contacto e a dirección de correo electrónico onde recibir a entrada.
Con eses mesmos datos doutras persoas socias, unha única pode retirar máis dunha entrada nunha soa xestión e, deste xeito, seleccionar asentos contiguos ou próximos.
Este procedemento ten dous fins: poder solicitar e recibir a entrada e, ademais, levar un control de repartición e localización na instalación.
O RC Deportivo solicita que unicamente tramiten a entrada aqueles socios e socias que vaian poder acudir, para evitar que queden afeccionados sen poder asistir unha vez completada a repartición da bancada nun proceso 100 % telemático.
A xestión pode realizarse desde a publicación desta nota informativa e até completar o aforamento. As socias e socios do RC Deportivo terán prioridade para a retirada da súa entrada gratuíta até o xoves 9 de maio ás 23:59 h. A partir dese momento, se houbese asentos aínda dispoñibles, habilitarase simultaneamente o sistema de entradas para o público en xeral (nesta ocasión tamén gratuítas), a través da mesma plataforma en bancada.rcdeportivo.es e seguindo o preceptivo sistema de rexistro.
